मनपाखरू...!!

आभाळ दाटून आलं तरी,

कोसळनं मात्र थांबलंय...!!

श्वास अडकलेल्या पाखरासम,

मन आता स्तब्ध झालंय...!!

कातरवेळीच्या सूर्यानंही,

क्षणभर क्षितिजावर आता थांबणं सोडलंय...!!

अथांग सागरावरती मात्र,

मनपाखरू क्षितिज शोधतंय..!!

डौलणाऱ्या वाऱ्याबरोबर,

निरोप घेणाऱ्या सुर्यासंगे,

न संपणारी शर्यत लावतंय..!!

लाटा आता सौम्य झाल्या,

किनाऱ्याला जाब विचारण्यासाठी...

तेव्हा पावलं मात्र थबकली,

मागं वळून पाहण्यासाठी...

 

तेव्हा उमटली पावलं जरी रेतीवरती ,

काटे मात्र टोचत राहती...

पुढच्याच क्षणी मात्र

मिळालेली फुलं आठवती...

संघर्षाच्या या पर्वाला,

तोलनं इतकं कठीण नाही,

काय मिळवलं काय गमावलं..?

इतकं छोटं गणित नाही...!!

ओंजळीतलीच फुलं आता 

देव्हाऱ्यात ठेवू,

ओंजळीतून निसटणाऱ्या

क्षणांना आता बंधमुक्त करू....!!

#मनपाखरू❣️

#जिंदगी_का_फंडा🍃

लिहिणं ....जगणं...!!

 

गड्या लिहावं म्हणतो असं काही,

पण आता शब्दांना वाचाच नाही...!!

आणलाच ओढून ताणून तरीही,

मन मात्र मानत नाही...!!

भावना मोठी की शब्द मोठे,

हा गोंधळ काहिकेल्या सुटत नाही..!!

लिहिलेलं भूतकाळात कधी,

एकांतात वाचत राहतो,

आपण आपल्याच काळाकडे,

कुतूहलाने पाहत राहतो...!!

म्हणूनच म्हणतो  गड्या,एकवेळ

गुदमरलेला श्वास वाचवेल प्राण

पण शब्दाविना भावना करतील गतप्राण...!!!

#लिहिणं❣️

#जगणं #जिंदगी_का_फंडा🍃

जगणं .... स्वप्नांचं...!!

 ढग आले दाटून आता,

वाटेवरती काळोख हा पसरला,

आणून मनगटात बळ आता,

फुलव स्वप्नांचा रम्य पिसारा...

वाऱ्या बरोबर पाऊसही येईल अवकाळी,

तरी न चुकणार लिहिलेलं ते भाळी...

साचून पानी डबक्यात आता बेडकं ही भेदरवतील,

आणले त्रान पायात या तर उंचावर नक्कीच जाशील, 

सप्नांच्या त्या रम्य पहाटेसाठी,

आता कोकिळेचं गाणं गा..

आनंदाश्रू टिपण्यासाठी आता,

मयुरासम फुलून पिसारा,

वसंताची  वाट  पहा....!!!

एकदिवस असा येईल,

घामाचेही मोती होतील;

अन् अभिमानाने शिरपेचात असतील,

कित्येक वर्षे कष्टाची कहाणी सांगतील

स्वप्नांची आग मनामधील

दाहीदिशा आता  

काजव्यासम उजळून टाकतील;

पावसामागुन पाऊस येतील

तेव्हा आणून मनगटात बळ आता 

स्वप्नांचा रम्य पिसारा फुलवतील....!!

#पाऊस #जगणं❣️

#जिंदगी_का_फंडा

जगण्याच्या वाटेवर....!!

 

तिन्हीसांजा जाहल्या जश्या

तसा साज हा चढला मावळतीला..

गीत गात पानांसंगती

साद देती  दूरदेशीच्या वाऱ्याला...

यात नजरेसही ना पडला बकुळ जरी

भुलवत राहतो त्या ललनापरी...

तेव्हाच एकांताच्या वाटेवरती

साद कोकिळेने द्यावी,

थबकल्या पावलांनी

वाट मात्र एकांताचीच धरावी...

बहरलेल्या गुलमोहराने

कित्येक अमावस्यानंतर 

लाटा किनाऱ्याला भिडल्याची

जाणीव द्यावी,

जाता जाता विरहानंतरच्या

भेटीची आस लावावी....

तिरप्या किरणांमध्ये

हीच निसर्ग निर्मिती उजळून निघावी

अन् मनामनात साठवावी,

जगण्याच्या वाटेवरच्या उमळणाऱ्या लाटांबरोबर

संथ सागराची अनुभुती घ्यावी....!!!

#जगणं❣️

#जिंदगी_का_फंडा🍃

मी असा...!!

 

जगण्याच्या वाटेवर,

अस्तित्वाच्या लढाईतला,

मी असा ऊन वाऱ्यातला...!!

  

ओसाड माळरानावर,

दगड गोट्यांच्या साथीततला,

मी असा चटके देऊन,

जगवणाऱ्या मातीतला...!!

वाऱ्यासंग सुगंध पेरणारा,

प्रहरीचा सूर्य माथ्यावर पेलणारा,

मी असा पावसासंग गीत गाणारा...!!

एकांतातला एकटेपणा

अन् एकटेपणातला एकांत,

यात वळून मागे पाहणारा,

मी असा

जन्म मातीतला, शेवट मातीतला 

पाहुणा या जगण्यातला...!!

#जगणं❣️

#जिंदगी_का_फ़ंडा🍃

शेवटाकडे जाताना...!!

 

वर्षाच्या शेवटाकडे जाताना,
आठवणींचं गाठोडं पाठी टाकून चालत रहायचं..!

स्वप्नांचं क्षितिज तेवढं गाठायचं,
मान्य काही स्वप्न लांबणीवर पडले,
केलेले काही संकल्प धुळीस मिळाले,
पण पुन्हा नव्याने शिकवण घेऊन
चालत रहायचं,
कर्तृत्वाचं क्षितिजपार करायचं..!!

जी मिळाली अनुभवांची शिदोरी,
बांधून ती जपून वापरायची,
यावर्षीची नवी डायरी मात्र,
यशाने-कर्तृत्वाने फुलवायची....!!

#स्वागत_नववर्षाचे❣️
#जिंदगी_का_फ़ंडा🍃

निरोप घेताना...!!!

 

निरोप देत सर्वांना,
पोहचला 'तो' पश्चिम क्षितिजाला...!!

तिचा हात हातात घेऊन ,
समजावत क्षणभर 'तो' थबकला...!!

तेव्हाच वाऱ्याने,
पानांबरोबर सूर धरला..!!

समुद्राच्या लाटांनी,
किनाऱ्याला मात्र जाब विचारला...!!

पण त्याला निरोप घेणं अटळ होतं,
याचं गमक फक्त तिलाच उमगलं होतं...!!

म्हणून निरोप 'तो' घेताना,
'ती' लपवते चेहऱ्यावरची छटा काळी,
भरते केशरी रंग कपाळी...!!

यांतच 'तो' आता क्षितिजाआड
जातो आहे,
मांडीवर डोकं ठेवून तिच्या
निरोप तो घेतो आहे...!!

#तो_सूर्य_ती_कातरवेळ❣️
#निरोप2022
#जिंदगी_का_फ़ंडा🍃

वळण...!!

चालता चालता आता वाटेनं

असं घेतलं वळण,

जसं उन्हातल्या पावलांना

पौर्णिमेचं स्मरण...!

म्हणूनच विसरून काट्यानां आता

जमलं फुलं जपणं,

सुकली जरी उन्हांत

तरी सुगंध श्वासात साठवणं....!!

गर्दीतल्या वाटेत सुद्धा 

जमलं आता एकांत जपणं,

ज्वालामुखी लपवून पोटातला

गर्द हिरवाईने नटणं..!!

अन् फुलांबरोबरंच काट्यांनाही

स्वीकारणं...!!

काहींच नाहीतर 

लेखणीला आपलं करणं...!!

एकटेपणा ऐवजी

एकांत जपणं...!!

मित्वापेक्षा स्वत्व ओळ्खणं...!!

#आयुष्य_हे❣️

#जिंदगी_का_फ़ंडा🍃

 

निरोप...!!

निरोप असा घ्यावा की,

घेणाऱ्याच्या वर्मीचा घाव

कोणा ना दिसावा...!!

निरोप असा घ्यावा की,

कातरवेळीचा महोत्सव फिका भासावा,

अन् कोजागिरीचा चंद्र रिता वाटावा.....!!

निरोप असा घ्यावा की,

श्रावणात ,शिशिराचं आगमन वाटावं,

ऐन अमावसेच्या रातीचं चांदणं

अंगणात उतरावं,

तिथंच पारिजातकाच्या फुलांनं

हळूच मातीत मिसळावं,

शेजारच्या फुलाच्या नकळत

लोप व्हावं,

सुगंध देत देत,मातीचं व्हावं....

निरोप असा घ्यावा

कातरवेळीच्या सुर्यासम प्रखर, तेजोमय , शांत सौम्य...!!

#निरोप❣️

#जिंदगी_का_फ़ंडा🍃

बाप माणूस...!!

बाप माणूस म्हणजे,

कडाक्याच्या थंडीतला

रखरखीत निखारा,

ऊब देत-देत

जळून राख होणारा...!!

बाप माणूस म्हणजे,

अथांग सागर,शांत तो भासणारा,

पोटात ज्वालामुखी तेवत ठेवत,

पृष्ठभाग संथ ठेवणारा...!!

बाप माणूस म्हणजे

काळ्या ढगांशी वारा

तो झुंजणारा,

शुष्क होताना

श्रावणसरी घेऊन येणारा...!!!

बाप माणूस म्हणजे

तुटकी वहाण रक्ताळलेल्या पायांची,

चालते वेदना घेऊन ती काट्यांची...!!

बाप माणूस म्हणजे

हसणाऱ्या चेहऱ्यावरची

दुखरी वेदना,

पश्चिम क्षितिजावर उठणारी

कातरवेळीची काळी संवेदना....!!!

#बाप_माणूस❣️

#जिंदगी_का_फ़ंडा🍃