निरोप...!!

निरोप असा घ्यावा की,

घेणाऱ्याच्या वर्मीचा घाव

कोणा ना दिसावा...!!

निरोप असा घ्यावा की,

कातरवेळीचा महोत्सव फिका भासावा,

अन् कोजागिरीचा चंद्र रिता वाटावा.....!!

निरोप असा घ्यावा की,

श्रावणात ,शिशिराचं आगमन वाटावं,

ऐन अमावसेच्या रातीचं चांदणं

अंगणात उतरावं,

तिथंच पारिजातकाच्या फुलांनं

हळूच मातीत मिसळावं,

शेजारच्या फुलाच्या नकळत

लोप व्हावं,

सुगंध देत देत,मातीचं व्हावं....

निरोप असा घ्यावा

कातरवेळीच्या सुर्यासम प्रखर, तेजोमय , शांत सौम्य...!!

#निरोप❣️

#जिंदगी_का_फ़ंडा🍃

बाप माणूस...!!

बाप माणूस म्हणजे,

कडाक्याच्या थंडीतला

रखरखीत निखारा,

ऊब देत-देत

जळून राख होणारा...!!

बाप माणूस म्हणजे,

अथांग सागर,शांत तो भासणारा,

पोटात ज्वालामुखी तेवत ठेवत,

पृष्ठभाग संथ ठेवणारा...!!

बाप माणूस म्हणजे

काळ्या ढगांशी वारा

तो झुंजणारा,

शुष्क होताना

श्रावणसरी घेऊन येणारा...!!!

बाप माणूस म्हणजे

तुटकी वहाण रक्ताळलेल्या पायांची,

चालते वेदना घेऊन ती काट्यांची...!!

बाप माणूस म्हणजे

हसणाऱ्या चेहऱ्यावरची

दुखरी वेदना,

पश्चिम क्षितिजावर उठणारी

कातरवेळीची काळी संवेदना....!!!

#बाप_माणूस❣️

#जिंदगी_का_फ़ंडा🍃

एकांताच्या वाटेवरून...!!

 एकांताच्या वाटेवरती,

अनेक वाटा येऊन मिळतील,

पूर्वार्धाच्या काळामध्ये,

कौतुकाचे गोडवे गातील...!!

अर्थात,

क्षणभर आख्खा प्रवास लोभस वाटेल,

त्यातच,

सहवासातला आनंद अगदी हरकून टाकेल...!!

पण गड्या,

लोभाच्या या गर्दीत,

कुठंतरी तू हरवून जातो,

मग पुन्हा शोध स्वतःचा घेत घेत,

खूप दूरवर चालत राहतो...!!

हरवून जाणं,हरकून जाणं,

हा निसर्गाचा नियम जरी,

तरी न चुकावावं चालत राहणं,

एकांताच्या वाटेवरी....!!

रे गड्या,

एकटेपणात अन् एकांतात,

जमीन आसमानाची दरी,

ज्याला जमलं पार करण्यास

जगण्याची नौका त्याची

पोहचते पैलतीरी....!!

म्हणून सांगतो गड्या,

एकांतात फुलायला शिक,

लढता-लढता हसायला शिक,

जग सुंदरतेने बहरून उठेल,

वाईटातल्या गर्दीत सुद्धा

उंचावलेला चांगला हात दिसेल,

धूळ खात अडगळीत पडलेलं,

सुद्धा धूळ झटकून सुंदर भासेल...!!

म्हणून म्हणतो गड्या,

आयुष्याच्या वाटेवरती,

कधीतरी एकांताची वाट धर,

चालत-चालत दुरवरती,

स्वतःला हरवून बघ,

नदीकाठच्या पैलतीरावर,

सुंदरतेच्या रेतीवर,

आठवणींचे साकव

जोडत-जोडत,

त्या शंख-शिंपल्यात

एकांताचा प्रवास बघ

सुंदर....सौम्य... अन् प्रगल्भ...!!!

#एकांत❣️

#जिंदगी_का_फ़ंडा🍃