दुनियादारी....

 

स्वार्थाची लक्तरे घेऊन जन्माला आलेली नाती कितीही ठिगळं लावली तरी फटकीच असतात...स्वार्थापोटी लावलेली हीच ठिगळं कधीनाकधी खऱ्या चेहऱ्यानिशी उघडी पडतात...!!

#दुनियादारी❣️

#जिंदगी_का_फंडा🍃

तिन्हीसांजा.....!!!

 

तिन्हीसांजा होऊन आता

पाखरं परतीचं गीत गाती,

कातर क्षणांची बंधमुक्ताई 

ही कातरवेळ करती...!!

त्या पल्याडच्या वाऱ्यानं

आता 

निरोप कानात सांगितला,

प्रत्येक सुरवातीचा

'शेवट' हा ठरलेला....!!!

उमगेल जेव्हा 

आपून मेहमान इथला हे

तेव्हा निर्ढावलेल्या मनाची

सुंदर परिभाषा होईल....!!

मग गड्या नाही केला

उगवत्यास नमस्कार जरी,

तरी जाणाऱ्याचा 

मी मात्र ऋणी असेल....!!

जमवत फुलांना 

ओंजळीत हळूवार 

सुगंध मात्र जपत राहील...

आलाच वाटता मज

तर दान मात्र देत राहील..!

बदल्यात मिळवा सुगंध

ही अपेक्षा मज नाही

मिळूच नये काटे 

असंही काही 

आस नाही...!!

फुलं वेचताना

रुततातच की काटे 

पण याच फुलांच्या 

काहण्यांमध्ये 

अग्रस्थानी 

असतातच की ते ओरखडे..!

वाटत-वाटत सुगंध गड्या

मोकळा मी जरी होईल

तरी 

कातरवेळी तुझ्या संगतीत

एकांत मात्र फक्त माझा अन् माझाच राहील..!

तेव्हा ही तू असाच भासशील

जाणाऱ्या तुझ्याबरोबर

असंख्य आठवणींच गाठोड रीतं

करशील,

हिशोबाच्या नोंदवहीत मात्र

बाकी शून्यच राहील..!

नाही जरी जाहला प्रवास तुजसम 

तरी निरोप मात्र व्हावा तुजसमच

शांत, सौम्य, तेजोमय.....

#कातरवेळ #जगणं❣️

#जिंदगी_का_फंडा🍃

माझी आई....!!

 जे जे चांगुले या देहात

ती देन तूझीच आई...!!

कष्टाळलेल्या घामाची

होणार नाही कधीच उतराई...!!

जशी शिवबांची जिजाई,

तशीच असते लेकरांची आई....!!

घराच्या घरपणाची,

शोभा असते तू....

अंगणातल्या तुळशीतला

दिवा असते तू....

कोपऱ्यावरच्या 

पारिजातकाचा सुगंध तू....

प्रसंगी नाराळसम 

आतून मधुर पण 

बाहेरून कणखर असते तू.....

प्रत्येकासाठी आई असते तू,

पण तुझ्यासाठी बाई असते तू....

पूर्व क्षितिजावरचं तेजोवलय तू,

वळवाच्या पहिल्या पावसाचं चैतन्य तू,

अंधारलेल्या वाटेवर काजव्याचा प्रकाश तू,

तिन्हीसांजेची कोकिळेचा साद तू,

तू ना शब्दात बांधली जाणारी,

तू ना कवितेत सांधली जाणारी...!!

भव्यदिव्य व्यक्तिमत्वाची

देवाची प्रतिकृती तू...

अगाध, अनंत, अखंड

मातृत्वाचा झरा तू....!!

#आई❣️

#मदर्स_डे_वगैरे🍃❣️

#जिंदगी_का_फंडा🍃

पाऊस अन् जगणं....!!

त्याच्या येण्याने 

चिंब भिजली ',

नकळत कवटाळलेल्या 

क्षणांना मुक्त करत

सृजन जाहली 'ती'...

पाहून भिजलेल्या तिज 

'तो' मात्र सुखावला,

कित्येक दिवसांच्या 

वाट पाहण्याला

खरा अर्थ लाभला...

भिजणं, 

भिजून त्यात एकरूप होणं,

किंवा खिडकीतून फक्त

त्याचं कोसळणे पाहणं,

हा क्षण ज्याचा त्याचा

पण प्रत्येक क्षणांचा

पाऊस मात्र नेहमीचाच...

कोणास आठवण,

पहिल्या भेटीची....

कोणास 

भेट मित्रांची,

त्या चहाच्या टपरीवरची....

कोणास 

गूज त्या पावसाबरोबर,

कोणास

अल्लड,अवखळ 

आपलीच जुनी साठवण...

कोणास,

जुने दिवस पावसाळी....

तर कोणास,

हलकेच आसवे 

पापनिवरची.....

कोणास,

पर्वणी कविमनची,

दिसे गर्द झाडीतून 

कोसळणाऱ्या धारा...

त्यास वाटे,

कोण्या परीच्या

गालावरून क्षण

प्रितीचा ओघळणारा.....!!

#पाऊस_जगणं_आठवण❣️

#जिंदगी_का_फंडा🍃

जगण्यातलं विश्व अन् विश्वातले आपण..!!

वाचलेलं अनुभवणं, 

अनुभवलेलं लिहिणं,

त्यातून भावलेलं 

आत्मसात करणं,

आत्मसात केलेलं

टिकवून ठेवणं,

टिकवलेलंच जगणं होणं,

त्याच जगण्याचा

हेवा वाटणं,

आपणच आपल्याकडे

कुतूहलाने पाहणं..

प्रत्येक गोष्टीत

चांगलंच दिसणं..

यातच एकंदर

जगणंच सुदंर भासणं..

यात कधी मोडलाच

काटा, लागलीच ठेच, 

आलीच आसवं...

तरी जगणं सुंदर 

आहे हे सांगणं..

 चांगुलपणावर

दृढ विश्वास ठेवणं..

अन् पुढं जाऊन 

आपलाच प्रवास आपण 

मागे वळून पाहणं,

हे परतीला निघालेल्या

सूर्याच्या महोत्सवासारखं

सुखावणारं असतं.....!!

#जगणं❣️

#जिंदगी_का_फंडा🍃

प्रीत...शब्दांची...शब्दांशी...!!

चोरट्या नजरेने

मागोवा तुझा घेतला होता,

कळूनही सर्वकाही

काहीच न कळण्याचा आव

मात्र त्याने आणला होता....

पापण्यांच्या  कोपऱ्यातून

न्याहळताना,

चित्र तुझेच रेखाटत होता...

पाठमोऱ्या तुजकडं पाहताना 

कल्पनांचा बांध मात्र सुटला होता...

माळलेल्या मोगऱ्याचा 

सखे सुगंध अजूनही भिनवतो..

पहाटेच्या स्तब्ध शांततेत

तो गीत मात्र तुझेच गातो...

गीत गात-गात

स्वप्नांच्या गावा जात,

कवेत तुझा भास होतो...

चुंबनांच्या अनेक ललकाऱ्यांनी

अंगावरी शहारे उमटवतो...

तेव्हांच उत्तररात्र मात्र

उतरणीला लागते,

स्वप्नांचा पसारा आवरून

वास्तवतेची आरव देते....

कल्पनांच्या सखे तुज 

 निरोप देऊन

तो मात्र अर्धवट कहाणीतलं 

आणखी एक पान जोडतो...

न कधी वाचलं जाणारं...

न कधी सांगितलं जाणारं ....

अव्यक्त....निःशब्द भावनांना

शब्दात जखडू पाहतो....!!

#लिहिणं #काल्पनिक❣️

#जिंदगी_का_फंडा🍃

तू सांजवेळची कविता...!!

 

दिवस संपून जातो,

तरी बाकी काहीतरी उरतेच,

उगवत्या बरोबर केलेली

खूणगाठ कुठंतरी सुटतेच....!!

कुठं सुटली म्हणून 

मन मात्र लढत राहतं,

एक मन दुसऱ्या मनाशी

वाद घालत राहतं...!!

अश्यातच दाराशी सांजवेळ 

टेकते,

तिरप्या किरणांनी 

अभिषेक घालते....!!

सांजवेळ झाली की 

त्याला 'तुझी' आठवण येते,

मग 'तु' त्यास सामावून घेते...

अन् बंद कुपितल्या मनाला

हलकेच फुंकर घालते...!!

सांजवेळी तुझी 

उणीव कधी ना भासावी

सांजवेळी कायम सोबती 'तू' असावी...!!

#तू_सांजवेळची_कविता❣️

#जागतिक_कविता_दिवस #world_poetry_day 😍

#जिंदगी_का_फंडा🍃

जगण्यातलं वाचन.....!!!

 

तुझ्या या साथीत नश्वर हा प्रवास व्हावा,

तुझी साथ न सुटता देह अनंतात सुटावा...

तुझ्या असण्याने जगणं समृध्द व्हावं,

खडकाळ या पाषाणावर

सर्जनशीलतेसहित बीज "माणसाचं" उमलावं....

स्पर्श होताच मातीस, त्या मातीचही सोनं व्हावं

त्यातून उगवणाऱ्या 

प्रत्येक बीजाचा-चांगुल्यांचा मेळा होईल...

नश्वर या जगण्याचा 

अखंडपणाचा प्रवास होईल....!!

#वाचन #निसर्ग #जगणं❣️

#जिंदगी_का_फंडा🍃

आयुष्यातलं जगणं...!!

 

आयुष्य.....

उडत-उडत घेत गिरक्या,

स्वतःच भोवताली घेतं फिरक्या....

कधी पोहचतं पश्चिम क्षितिजाला,

त्यांचं त्यास भान नसतं...

यात जगणं मात्र उनाड

पक्ष्यासावे वाऱ्यावरती उधळतं....

अन् गिरक्या घेता घेता

एकवार वळून मागं बघतं...

आपल्याच सुंदर क्षणासंग

खुदकन गालात हसतं. ..

हसता-हसता, निरोप घेता घेता

सांगून जातं. ...

कित्येक क्षणांचा साज ल्यालेलं 

तरीही आयुष्य हे कस्पटासम असतं...

बघता बघता 

अंतिमतः मातीत मिसळतं 

जी माती सांगत राहते अनंतकाळ 

आयुष्य हे जरी कस्पटासम

पण त्यातलं जगणं मात्र असावं 

आकाशातल्या अढळ ध्रुवताऱ्यासम

कायम आसमंतात सुगंध पेरणाऱ्या बकुळीच्या फुलासम....

#आयुष्य❣️

#जिंदगी_का_फंडा🍃

आयुष्य क्षणांच...!!

 

क्षणा क्षणाने आयुष्य

सरत जाईल..

आजचा हा क्षण

उद्यासाठी भूतकाळात 

जमा होईल...

मिळालेल्या जखमांवर

बळच फुंकर घातली जाईल..

मिळालेल्या त्या पुंजीलाच

यश समजत राहील...

पण तेव्हाच  गमावलेलं

क्षण मात्र एकांतात 

प्रश्न विचारत राहतील..

होऊन गेलेल्या त्या प्रवासात

वेडं मन हरवू पाहिल..

एकेका क्षणात जखडू पाहिल..

अन् पुन्हा त्या अनवट वाटांवर

एकट्या मनाची वाट आढवील..

आठवणीत रमवत राहील

कळत नकळत नजरेनच

अर्ध्य देवू पाहिल...

म्हणूनच रे गड्या, जगावं असं

आजचा क्षण

उद्याच्या भूतकाळातला

सुंदर क्षण गणला जावा...

थरथरणारी क्षीण पावलं

परतीच्या दिशेने पडताना

त्या क्षणांनी गालिचा अंथरावा..

अन् सूर्य अस्तास जातानाही

त्या क्षणांचा महोत्सव व्हावा....!!

अगदी प्रवास संपतानासुद्धा......!!!

#प्रवास #जगणं♥️

#जिंदगी_का_फंडा🍃